అప్పుడు వాలంటీర్లు.. ఇప్పుడు ఇన్ఫ్లుయెన్సర్లు! తేడా ఎక్కడ?
ఆంధ్రప్రదేశ్లో రాజకీయ సమీకరణాలు ఎప్పుడూ రసవత్తరంగానే ఉంటాయి. అయితే తాజాగా ఎన్డీయే కూటమి ప్రభుత్వం తీసుకున్న ఒక నిర్ణయం ఇప్పుడు రాజకీయ వర్గాల్లో పెను దుమారానికి, తీవ్ర చర్చలకు వేదికైంది. సోషల్ మీడియా ఇన్ఫ్లుయెన్సర్లకు ప్రతి నెలా గౌరవ వేతనం లేదా నిర్దిష్ట పారితోషికం అందించే విధానానికి రాష్ట్ర క్యాబినెట్ ఆమోదం తెలపడమే ఇందుకు కారణం. వినోదాన్ని, కంటెంట్ను అందించే ఇన్ఫ్లుయెన్సర్లకు ప్రభుత్వ ఖజానా నుంచి నిధులు కేటాయించడం ఏమిటన్న ప్రశ్నలు సర్వత్రా వ్యక్తమవుతున్నాయి.
ఇన్ఫ్లుయెన్సర్లకు ప్రతినెలా డబ్బు:
కూటమి ప్రభుత్వ వర్గాల సమాచారం ప్రకారం.. ప్రస్తుత డిజిటల్ యుగంలో సంప్రదాయ ప్రచార సాధనాల కంటే సోషల్ మీడియా ప్రభావం ప్రజలపై బలంగా ఉంటోంది. ప్రభుత్వం ప్రవేశపెడుతున్న సంక్షేమ పథకాలు, అభివృద్ధి కార్యక్రమాలు, వాటి వల్ల ప్రజలకు చేకూరే ప్రయోజనాలను సామాన్యులకు సైతం సులభంగా అర్థమయ్యే రీతిలో వివరించడమే ఈ విధానం యొక్క ముఖ్య ఉద్దేశమని నేతలు స్పష్టం చేస్తున్నారు. డిజిటల్ క్రియేటర్ల రీచ్ను సమర్థవంతంగా వినియోగించుకుని, ప్రభుత్వ పథకాల లబ్ధిని నేరుగా అర్హులకు చేరవేయాలనే ఆలోచనతోనే ఈ విధానాన్ని రూపకల్పన చేసినట్లు అధికార పక్షం వాదిస్తోంది.
గత వాలంటీర్ వ్యవస్థకు.. ఇప్పటి విధానానికి పోలిక!
అయితే రాజకీయ విశ్లేషకులు ఈ పరిణామాన్ని గత ప్రభుత్వ విధానాలతో పోల్చి చూస్తున్నారు. గతంలో వైఎస్ జగన్మోహన్ రెడ్డి ముఖ్యమంత్రిగా ఉన్న సమయంలో 'వాలంటీర్ వ్యవస్థ'ను అత్యంత ప్రతిష్టాత్మకంగా తెరపైకి తెచ్చారు. ప్రతి నెలా రూ.5,000 గౌరవ వేతనంతో ప్రభుత్వ పథకాలను ఇంటింటికీ డెలివరీ చేసేందుకు ఆ వ్యవస్థను ఉపయోగించారు. క్షేత్రస్థాయిలో పాలన ప్రజల ముంగిటకు చేరిందనే ప్రశంసలు వచ్చినప్పటికీ.. అప్పట్లో ప్రతిపక్షంలో ఉన్న టీడీపీ, జనసేన నేతలు వాలంటీర్ వ్యవస్థపై నిప్పులు చెరిగారు. సీఎం చంద్రబాబు నాయుడు, మంత్రి నారా లోకేష్, డిప్యూటీ సీఎం పవన్ కళ్యాణ్ తదితరులు వాలంటీర్లను కేవలం రాజకీయ ప్రయోజనాల కోసం, పార్టీ ప్రచారం కోసమే వాడుకుంటున్నారంటూ తీవ్రస్థాయిలో విమర్శలు గుప్పించిన సంగతి విధితమే.
వైసీపీ (ycp ) తీవ్ర విమర్శలు:
అప్పట్లో జగన్ ( ys Jagan ) చేసిన వాలంటీర్ ప్రయోగాన్ని తప్పుబట్టిన నేతలే.. ఇప్పుడు అదే తరహాలో ఇన్ఫ్లుయెన్సర్లను ఏర్పాటు చేసుకుని ప్రభుత్వ నిధులతో ప్రచారం చేయించుకోవాలని చూడటం ఏమిటంటూ వైఎస్సార్సీపీ ఎదురుదాడి ప్రారంభించింది. గతంలో ఇంటింటికీ తిరిగి ప్రజలకు సేవలందించే వాలంటీర్లపై నిందలు వేసి, ఇప్పుడు కేవలం సోషల్ మీడియాలో పోస్టులు పెట్టే వారికి ప్రజాధనం కట్టబెట్టడం ద్వంద్వ నీతి కాదా అని ప్రశ్నిస్తోంది.
మొత్తానికి.. క్షేత్రస్థాయిలో ప్రజలతో సంబంధాలు నెరపడానికి జగన్ వాలంటీర్లను నమ్ముకుంటే, డిజిటల్ యుగంలో సోషల్ స్పేస్ను శాసించడానికి చంద్రబాబు ఇన్ఫ్లుయెన్సర్లను రంగంలోకి దించుతున్నారా అనే చర్చ రాజకీయ వర్గాల్లో జోరందుకుంది. క్యాబినెట్ ఆమోదం పొందిన ఈ సరికొత్త విధానం అమలులోకి వస్తే ఏ మేరకు ఫలితాన్ని ఇస్తుందో, రాజకీయంగా ఎవరికి ప్రయోజనం చేకూరుస్తుందో వేచి చూడాలి!
కామెంట్లు లేవు