నందికొట్కూరులో రూ.21 కోట్లతో అభివృద్ధి పనులు: ఎమ్మెల్యే జయసూర్య

 

నందికొట్కూరు నియోజకవర్గ సమగ్ర అభివృద్ధే ధ్యేయంగా కూటమి ప్రభుత్వం ముందడుగు వేస్తోంది. పట్టణంలో మౌలిక వసతుల కల్పన కోసం ‘హైబ్రిడ్ యాన్యుటీ మోడల్’ (HAM) పథకం కింద మంజూరైన రూ.21 కోట్ల విలువైన వివిధ అభివృద్ధి పనులకు స్థానిక ఎమ్మెల్యే గిత్త జయసూర్య ఘనంగా శంకుస్థాపన చేశారు. కుప్పం పర్యటనలో ఉన్న ముఖ్యమంత్రి నారా చంద్రబాబు నాయుడు ఈ పనులను వర్చువల్ విధానం ద్వారా లాంఛనంగా ప్రారంభించారు. ఈ పనుల ద్వారా పట్టణంలో రహదారులు, డ్రైనేజీ వ్యవస్థ సహా ఇతర ప్రధాన సదుపాయాలు మెరుగుపడనున్నాయి.

అభివృద్ధి కళ్లముందే కనిపిస్తున్నా విమర్శలా?

శంకుస్థాపన అనంతరం ఎమ్మెల్యే గిత్త జయసూర్య మీడియాతో మాట్లాడుతూ వైఎస్సార్ కాంగ్రెస్ పార్టీ నేతల తీరుపై తీవ్రస్థాయిలో విరుచుకుపడ్డారు. పట్టణంలో రూ.కోట్ల నిధులతో శరవేగంగా అభివృద్ధి పనులు సాగుతుంటే ప్రతిపక్ష నేతలకు అవి కనిపించడం లేదా అని ప్రశ్నించారు. ప్రజలకు మంచి జరుగుతుంటే ఓర్వలేక అసత్య ప్రచారాలు చేస్తున్నారని మండిపడ్డారు.

డంపింగ్ యార్డు అంశంలో పిల్లలతో రాజకీయాలా?

డంపింగ్ యార్డు వివాదంపై స్పందించిన ఎమ్మెల్యే.. రాజకీయ స్వార్థం కోసం చిన్న పిల్లలను రోడ్లపైకి తెచ్చి ఆందోళనలు చేయించడం హేయమైన చర్య అని ఆగ్రహం వ్యక్తం చేశారు. పిల్లల భవిష్యత్తును పణంగా పెట్టి రాజకీయ లబ్ధి పొందాలని చూడటం మంచి పద్ధతి కాదని, ఇలాంటి నీచ రాజకీయాలను తక్షణమే మానుకోవాలని హితవు పలికారు. ప్రజల సమస్యల పరిష్కారానికి ప్రభుత్వం అన్ని చర్యలు తీసుకుంటోందని స్పష్టం చేశారు.

స్థానిక ఎన్నికల్లో అల్లర్లకు పాల్పడితే కఠిన చర్యలు:

త్వరలో జరగనున్న స్థానిక సంస్థల ఎన్నికల నేపథ్యంలో శాంతిభద్రతలకు విఘాతం కలిగిస్తే చట్టపరంగా తీవ్ర పరిణామాలు ఉంటాయని ఎమ్మెల్యే హెచ్చరించారు. ఎన్నికల వేళ ఎవరైనా శాంతియుత వాతావరణాన్ని చెడగొట్టాలని చూసినా, అల్లర్లకు పాల్పడినా సహించే ప్రసక్తే లేదని స్పష్టం చేశారు. ప్రజాస్వామ్యబద్ధంగా ఎన్నికలు జరిగేందుకు ప్రజలు సహకరించాలని, నియోజకవర్గాన్ని అన్ని రంగాల్లో ఆదర్శంగా తీర్చిదిద్దడమే తమ లక్ష్యమని పేర్కొన్నారు.