అధినేత అరెస్టు అప్పుడేనా? కూటమి వ్యూహాలు!
ఆంధ్రప్రదేశ్ రాజకీయాల్లో ఎప్పుడూ ఊహించని పరిణామాలు, సంచలన సమీకరణాలు తెరపైకి వస్తూనే ఉంటాయి. గతంలో విపక్ష నేతగా ఉన్న చంద్రబాబు నాయుడు అరెస్ట్ రాష్ట్ర రాజకీయాల్లో తీవ్ర ప్రకంపనలు సృష్టించిన సంగతి విధితమే. ఆ తర్వాత మారిన రాజకీయ పరిణామాల్లో టీడీపీ, జనసేన, బీజేపీ కూటమి ఘన విజయం సాధించి అధికారంలోకి వచ్చింది. అయితే కూటమి ప్రభుత్వం అధికార పగ్గాలు చేపట్టిన నాటి నుంచి వైసీపీ వర్సెస్ కూటమి వార్ తారస్థాయికి చేరింది. ప్రస్తుతం ఏపీ రాజకీయ వర్గాల్లో ఒక్కటే ప్రశ్న తీవ్ర చర్చనీయాంశంగా మారింది. అదేంటంటే "వైసీపీ అధినేత, మాజీ ముఖ్యమంత్రి వైఎస్ జగన్మోహన్ రెడ్డి తదుపరి టార్గెట్ కానున్నారా? ఆయన అరెస్ట్ దిశగా కూటమి ప్రభుత్వం పావులు కదుపుతోందా?"
హాట్ టాపిక్‌గా మారిన జగన్ తాజా వ్యాఖ్యలు
ఇటీవల కాలంలో వైఎస్ జగన్ చేసిన పలు వ్యాఖ్యలు, ఆరోపణలు పొలిటికల్ సర్కిల్స్‌లో ఈ అనుమానాలకు మరింత ఆజ్యం పోశాయి. "నన్ను అరెస్ట్ చేసినా భయపడేది లేదు.. ప్రజల పక్షాన పోరాడుతూనే ఉంటా" అన్న సంకేతాలు ఆయన మాటల్లో కనిపించాయి. మరోవైపు, వైసీపీ హయాంలో కీలక చక్రం తిప్పిన పలువురు ముఖ్య నేతలు ఇప్పటికే వివిధ కేసుల్లో విచారణలు ఎదుర్కొంటూ, కొందరు అరెస్ట్ కావడం చూస్తున్నాం. కింది స్థాయి నేతలు, మాజీ మంత్రుల తర్వాత ఇప్పుడు ఏకంగా పార్టీ సుప్రీమో పైనే దర్యాప్తు సంస్థల నిఘా కేంద్రీకృతమైందా అనే గుసగుసలు వినిపిస్తున్నాయి.
కూటమి ప్రభుత్వ ఆరోపణలు.. దర్యాప్తుల ఉచ్చు
వైసీపీ ఐదేళ్ల పాలనలో పలు సంక్షేమ పథకాలు, భారీ ప్రాజెక్టులు, అభివృద్ధి పనుల పేరిట భారీ ఎత్తున నిధుల మళ్లింపు జరిగిందని కూటమి ప్రభుత్వం మొదటి నుంచీ ఆరోపిస్తోంది. మద్యం పాలసీ, మైనింగ్, భూ కేటాయింపులు, పథకాల నిధుల లెక్కల్లో తీవ్ర అవకతవకలు జరిగాయని, వాటిపై పూర్తిస్థాయి విచారణలు జరిపించి బాధ్యులపై కఠిన చర్యలు తీసుకుంటామని అధికార పక్షం స్పష్టం చేస్తూ వస్తోంది. ఈ దర్యాప్తుల పరంపర క్రమంగా ముదురుతుండటంతో, లీగల్ అంశాల ఆధారంగా జగన్ చుట్టూ ఉచ్చు బిగిస్తున్నారా అనే కోణంలో జోరుగా డిబేట్లు సాగుతున్నాయి.
2027 పాదయాత్ర.. 2029 టార్గెట్
ఓటమి నుంచి పాఠాలు నేర్చుకుని తిరిగి ప్రజల్లోకి వెళ్లేందుకు జగన్మోహన్ రెడ్డి ఇప్పటికే ఒక స్పష్టమైన రోడ్‌మ్యాప్ సిద్ధం చేసుకున్నారు. 2029 సార్వత్రిక ఎన్నికలే లక్ష్యంగా 2027 లో రాష్ట్రవ్యాప్తంగా భారీ పాదయాత్ర చేపట్టనున్నట్లు ఆయన స్వయంగా వెల్లడించారు. గతంలో ఆయన చేసిన ప్రజాసంకల్ప యాత్రే 2019లో అధికారంలోకి రావడానికి బలమైన పునాది వేసింది. అదే నమ్మకంతో మరోసారి ప్రజల మధ్యకు వెళ్లేందుకు ఆయన ఇప్పటి నుంచే క్షేత్రస్థాయి వ్యూహాలు రచిస్తున్నారు.
పాదయాత్ర వేళ అరెస్ట్ జరిగితే.. ఎవరికి లాభం?
రాజకీయ విశ్లేషకుల అంచనాల ప్రకారం.. పాదయాత్ర సమయంలో ఒకవేళ జగన్ అరెస్ట్ పరిణామాలు చోటుచేసుకుంటే అది కూటమి ప్రభుత్వానికి రెండు వైపులా పదునున్న కత్తిలా మారే ప్రమాదం ఉంది.
వైసీపీకి వచ్చే సానుభూతి: రాజకీయాల్లో ఎప్పుడూ 'సింపతీ ఫ్యాక్టర్' కీలకంగా పనిచేస్తుంది. గతంలో దివంగత వైఎస్ రాజశేఖర రెడ్డి పాదయాత్రకు, అనంతరం జగన్ ఓదార్పు, ప్రజాసంకల్ప యాత్రలకు ప్రజల నుంచి విపరీతమైన మద్దతు లభించింది. ఇప్పుడు ఒకవేళ ఆయన యాత్ర చేస్తుండగా అడ్డంకులు సృష్టించినా లేదా అరెస్ట్ చేసినా, అది నేరుగా ప్రభుత్వ కక్షసాధింపు చర్యగా ప్రజల్లోకి వెళ్లే అవకాశం ఉంటుంది.
వైసీపీ రీ-బూస్ట్: ఇలాంటి పరిణామం స్తబ్దుగా ఉన్న వైసీపీ క్యాడర్‌ను ఒక్కసారిగా రోడ్లపైకి తెచ్చి పార్టీకి అదనపు మైలేజ్ ఇచ్చే అవకాశం ఉందని విశ్లేషకులు చెబుతున్నారు.
కూటమి వ్యూహం ఏమిటి?
కూటమి పెద్దలు రాజకీయ అనుభవజ్ఞులు. తొందరపడి ఒక ప్రతిపక్ష నేతను అరెస్ట్ చేసి ఆయనకు ప్రజా క్షేత్రంలో సానుభూతి సంపాదించిపెట్టే సాహసం అంత సులభంగా చేయకపోవచ్చు. కేవలం రాజకీయ ప్రేరేపిత చర్యగా కాకుండా, తిరుగులేని ఆర్థిక నేరాలు లేదా నిధుల మళ్లింపు ఆధారాలు పక్కాగా ఉంటేనే లీగల్ ప్రాసెస్ ముందుకు వెళ్లే అవకాశం ఉంటుంది. అప్పటివరకు విచారణలు, ఆరోపణల ద్వారానే రాజకీయంగా డిఫెన్స్‌‌లో నెట్టే ప్రయత్నాలు జరుగుతాయా?, లేక నిజంగానే కఠిన నిర్ణయాల దిశగా అడుగులు పడతాయా? అనేది తేలాల్సి ఉంది.
కామెంట్‌లు లేవు